കോട്ടയം: പുതുപ്പള്ളിയിലേത് രാഷ്ട്രീയ പോരാട്ടമെന്ന് യുഡിഎഫ് സ്ഥാനാര്‍ത്ഥിയും ഉമ്മന്‍ചാണ്ടിയുടെ മകനുമായ ചാണ്ടി ഉമ്മന്‍. ഇത്ര വേഗത്തില്‍ തെരഞ്ഞെടുപ്പ് പ്രതീക്ഷിച്ചിരുന്നില്ല. അച്ഛന്റെ മരണം കഴിഞ്ഞ് ചുരുങ്ങിയ ദിവസങ്ങള്‍ക്കുള്ളില്‍ തിരഞ്ഞെടുപ്പിന് ഇറങ്ങേണ്ടി വരുന്നതില്‍ മാനസിക ബുദ്ധിമുട്ടുണ്ട്. പാര്‍ട്ടി ഏല്‍പ്പിച്ച ഉത്തരവാദിത്വം എന്ന നിലയില്‍ സ്ഥാനാര്‍ഥിത്വം ഏറ്റെടുക്കുന്നുവെന്നും ചാണ്ടി ഉമ്മന്‍ കൂട്ടിച്ചേര്‍ത്തു.
ഉമ്മന്‍ചാണ്ടിയാവാന്‍ തനിക്ക് കഴിയില്ല. ഉമ്മന്‍ചാണ്ടിയുടെ പിന്‍ഗാമിയാവുക വെല്ലുവിളിയാണ്. അതൊരു സമ്മര്‍ദ്ദമാണ്. സൂര്യനായിരുന്നു ഉമ്മന്‍ചാണ്ടി. സൂര്യന്റെ പ്രഭയില്‍ നില്‍ക്കുന്ന ചന്ദ്രന്‍ മാത്രമാണ് താന്‍. താന്‍ പിന്‍ഗാമിയാകണമെന്ന് പിതാവിന് ആഗ്രഹം ഉണ്ടായിരുന്നിരിക്കാം. ഉമ്മന്‍ചാണ്ടിക്കെതിരായ സി പി എം വിമര്‍ശനങ്ങള്‍ക്ക് മറുപടി പറയാനില്ലെന്നും ചാണ്ടി ഉമ്മന്‍ പറഞ്ഞു.