പൂഞ്ഞാര്‍: സിപിഎം സംസ്ഥാന സമിതി അംഗം കെ അനില്‍കുമാറിന്റെ തട്ടം പരാമര്‍ശത്തില്‍ വിവാദം കത്തുമ്പോള്‍ പ്രതികരണവുമായി ജനപക്ഷം പാര്‍ട്ടി നേതാവ് ഷോണ്‍ ജോര്‍ജ്. മനുഷ്യന്‍ ചന്ദ്രനില്‍ ഫുട്‌ബോള്‍ കളിച്ചു തുടങ്ങിയെന്നും മലയാളി ഇപ്പോഴും തട്ടത്തില്‍ തട്ടി നില്‍ക്കുകയാണെന്നും ഷോണ്‍ ജോര്‍ജ് ഫേസ്ബുക്കില്‍ കുറിച്ചു. എന്ന് നേരം വെളുക്കുവോ എന്തോ എന്ന ചോദ്യവും ഷോണ്‍ ജോര്‍ജ് ഉന്നയിച്ചു. അതേസമയം, അനില്‍കുമാറിന്റെ തട്ടം പരാമര്‍ശം സംസ്ഥാന സെക്രട്ടറി എം വിഗോവിന്ദന്‍ തളളിയെങ്കിലും മുസ്ലിം ലീഗ് നിലപാട് കടുപ്പിച്ചിരുന്നു.
പരാമര്‍ശം അനവസരത്തിലാണെന്ന് പി കെ കുഞ്ഞാലിക്കുട്ടി പറഞ്ഞു. എങ്ങനെ സിപിഎമ്മിന് ഇത്തരം ഒരു പിഴവ് പറ്റിയെന്നും തിരുത്തേണ്ട സാഹചര്യം വന്നുവെന്നും പരിശോധിക്കണം. തിരുത്ത് കൊണ്ട് മാത്രം തീരുന്ന വിഷയം അല്ല. ആരുടേയും വിശ്വാസങ്ങളിലേക്ക് കടന്നു കയറരുത്. ഇന്ത്യ മുന്നണിയില്‍ ഇരിക്കുന്ന ഒരു കക്ഷിക്ക് ഉണ്ടാവാന്‍ പാടില്ലാത്ത നിലപാടാണിതെന്നും അദ്ദേഹം പറഞ്ഞു.