ന്യൂഡല്ഹി: ഇസ്രയേലില് നിന്ന് ഇന്ത്യക്കാരെ ഒഴിപ്പിക്കാനുള്ള പ്രത്യേക ദൗത്യത്തിന് ഇന്ന് തുടക്കം. ഓപ്പറേഷന് അജയ് എന്ന് പേരിട്ടിരിക്കുന്ന ദൗത്യത്തിലൂടെ ഇസ്രയേലില് കുടുങ്ങിയ ഇന്ത്യക്കാരെ മുഴുവന് തിരികെ എത്തിക്കുമെന്ന് കേന്ദ്ര സര്ക്കാര്. അതിനിടെ ഇസ്രയേലില് കുടുങ്ങിയ മലയാളി തീര്ത്ഥാടകരുടെ ആദ്യ സംഘം കേരളത്തിലേക്ക് തിരിച്ചെത്തി.
ഇസ്രയേലില് കുടുങ്ങിപ്പോയ മുഴുവന് ഇന്ത്യാക്കെരെയും പ്രത്യേക ചാര്ട്ടര് വിമാനങ്ങളും മറ്റ് ക്രമീകരണങ്ങളും ഏര്പ്പെടുത്തി രാജ്യത്ത് തിരിച്ചെത്തിക്കുമെന്ന് വിദേശകാര്യ മന്ത്രി എസ് ജയശങ്കര് അറിയിച്ചു. ഓപ്പറേഷന് അജയിന്റെ ഭാഗമായുള്ള ആദ്യ പ്രത്യേക വിമാനം ഇസ്രയേലിലേക്ക് പുറപ്പെട്ടു. ടെല്അവീവില് നിന്ന് ആദ്യ സംഘം ഇന്ന് പുറപ്പെടും. ആവശ്യമെങ്കില് നാവിക സേന കപ്പലുകളും രക്ഷാദൗത്യത്തിന്റെ ഭാഗമാകും. നാവികസേനയോട് സജ്ജമായിരിക്കാന് കേന്ദ്രം നിര്ദേശം നല്കി.