കൊച്ചി: ഏറെ വിവാദമായ കൊച്ചിയില് നടിയെ ആക്രമിച്ച കേസില് വിധി ഡിസംബര് 8 ന് .ഏഴു വര്ഷത്തോളം നീണ്ട വിചാരണ നടപടികള്ക്കൊടുവിലാണ് നടി ആക്രമിക്കപ്പെട്ട കേസ്സില് എറണാകുളം പ്രിന്സിപ്പല് സെഷന്സ് കോടതി വിധി പറയാന് പോകുന്നത്.
എറണാകുളം പ്രിന്സിപ്പല് സെഷന്സ് കോടതിയിലാണ് അന്തിമ വാദം നടന്നത്. കഴിഞ്ഞ ഏപ്രിലില് പ്രൊസിക്യൂഷന്റെയും പ്രതിഭാഗത്തിന്റെയും വാദം പൂര്ത്തിയായിരുന്നു. ഇതിന് ശേഷം 27 തവണയാണ് വാദത്തില് വ്യക്തത വരുത്തുന്നതിനായി കേസ് വിചാരണക്കോടതി മാറ്റിവെച്ചത്.
നെടുമ്പാശേരി പൊലീസ് രജിസ്റ്റര് ചെയ്ത് ക്രൈംബ്രാഞ്ച് അന്വേഷണം പൂര്ത്തിയാക്കിയ കേസില് ആകെ 9 പ്രതികളുണ്ട്. പള്സര് സുനി ഒന്നാംപ്രതിയും നടന് ദിലീപ് എട്ടാംപ്രതിയുമാണ്. അനുബന്ധ കുറ്റപത്രം അനുസരിച്ച് ബലാത്സംഗ ഗൂഡാലോചന കേസിലാണ് ദിലീപിനെ പ്രതിചേര്ത്തത്. കഴിഞ്ഞ വര്ഷം വിചാരണ നടപടികള് പൂര്ത്തിയായി എങ്കിലും അന്തിമ നടപടിക്രമങ്ങള് ഒരുവര്ഷത്തിലധികം നീണ്ടു.
2017 ഫെബ്രുവരി മാസം 17നാണ് കൊച്ചി നഗരത്തില് ഓടുന്ന വാഹനത്തില് വെച്ച് നടിയെ ആക്രമിച്ചത്. 2018 മാര്ച്ചിലാണ് കേസിലെ വിചാരണ നടപടികള് ആരംഭിച്ചത്. ദിലീപും പള്സര് സുനിയും ഉള്പ്പെടെ കേസിലാകെ ഒമ്പത് പ്രതികളാണുള്ളത്. ആക്രമിക്കപ്പെട്ട നടിയോട് ദിലീപിന് മുന്വൈരാഗ്യം ഉണ്ടായിരുന്നുവെന്നും ഇതേത്തുടര്ന്നാണ് കൃത്യം ആസൂത്രണം ചെയ്ത് നടപ്പാക്കിയത് എന്നുമാണ് അന്വേഷണ സംഘത്തിന്റെ കണ്ടെത്തല്.
2017 നവംബറില് കുറ്റപത്രം സമര്പ്പിച്ചു. 2018 മാര്ച്ച് എട്ടിന് എറണാകുളം പ്രിന്സിപ്പല് സെഷന്സ് കോടതിയില് വിചാരണ ആരംഭിച്ചു. 2018 ജൂണില് സി ബി ഐ അന്വേഷണം ആവശ്യപ്പെട്ട് ദിലീപ് ഹൈക്കോടതിയില് സമര്പ്പിച്ച ഹര്ജി ഹൈക്കോടതി സിംഗിള് ബെഞ്ച് തള്ളി. സാക്ഷി വിസ്താരം പൂര്ത്തിയായത് നാലര വര്ഷം കൊണ്ടായിരുന്നു.