ന്യൂഡല്ഹി: മുംബൈയില് എയര് ഹോസ്റ്റസിനെ കഴുത്തറുത്തു കൊലപ്പെടുത്തിയ കേസിലെ പ്രതിയെ ലോക്കപ്പില് തൂങ്ങിമരിച്ച നിലയില് കണ്ടെത്തി. എയര്ഹോസ്റ്റസ് രൂപല് ഒഗ്രേയെ കൊലപ്പെടുത്തിയ വിക്രം അത്വലിനെയാണ് ലോക്കപ്പില് തൂങ്ങിമരിച്ചനിലയില് കണ്ടെത്തിയത്. ഇന്നലെ രാവിലെയാണ് ഇയാളെ അന്ധേരി പൊലീസ് സ്റ്റേഷനിലെ ലോക്കപ്പില് തൂങ്ങിമരിച്ചനിലയില് കണ്ടത്.
പാന്റ് കീറി അതുപയോഗിച്ച് കുളിമുറിയില് തൂങ്ങിമരിച്ചനിലയിലാണ് വിക്രമിനെ കണ്ടെത്തിയത്. റിമാന്ഡ് കാലാവധിതീര്ന്ന ഇയാളെ ഇന്നലെ കോടതിയില് ഹാജരാക്കേണ്ടതായിരുന്നു.
ഛത്തീസ്ഗഢ് സ്വദേശിയായ രൂപല് ഒഗ്രേ കഴിഞ്ഞയാഴ്ചയാണ് അന്ധേരിയിലെ ഫ്ളറ്റിനുള്ളില് കൊല്ലപ്പെട്ടത്. എയര് ഇന്ത്യയില് ട്രെയിനി എയര്ഹോസ്റ്റസ് ആയിരുന്നു കൊല്ലപ്പെട്ട രൂപല്. ഹൗസിങ് സൊസൈറ്റിയിലെ ശുചീകരണ തൊഴിലാളിയായ വിക്രം യുവതിയെ കഴുത്തറുത്ത് കൊലപ്പെടുത്തുകയായിരുന്നുവെന്നാണ് പൊലീസ് പറയുന്നത്. ഉപദ്രവിക്കാനുള്ളശ്രമത്തെ യുവതി ചെറുത്തതോടെ കുത്തുകയായിരുന്നുവെന്ന് ഇയാള് കുറ്റസമ്മതം നടത്തിയിരുന്നു.