അന്തരിച്ച നടന് കുണ്ടറ ജോണിയുടെ സംസ്കാര ചടങ്ങുകള് നാളെ നടക്കും. ഇന്ന് രാവിലെ 10 മണിക്ക് കൊല്ലം കടപ്പാക്കട സ്പോര്ട്ട്സ് ക്ലബില് പൊതു ദര്ശനത്തിന് ശേഷം മൃതദേഹം ഉച്ചയോടെ കുണ്ടറയിലെ കുടുംബവീട്ടിലേക്ക് കൊണ്ടു പോകും.
കഴിഞ്ഞ ദിവസം രാത്രി 10 മണിയോടെയാണ് കൊല്ലം ബെന്സിയര് ആശുപത്രിയില് വെച്ച് ഹൃദയാഘാതത്തെ തുടര്ന്ന് അന്ത്യം സംഭവിച്ചത്. ഹോട്ടലില് നിന്ന് ഭക്ഷണം കഴിച്ച ശേഷം മകനൊപ്പം വീട്ടിലേക്ക് മടങും വഴി ദേഹാസ്വസ്ഥ്യം അനുഭവപ്പെടുകയായിരുന്നു. ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല. കൊല്ലം ഫാത്തിമ മാത നാഷണല് കോളേജിലെ അദ്ധ്യാപികയായ സ്റ്റെല്ലയാണ് ഭാര്യ.
കൊല്ലം ജില്ലയിലെ കുണ്ടറയിലാണ് ജോണി ജനിച്ചത്. പിതാവ് ജോസഫ്, അമ്മ കാതറിന്. കൊല്ലം ഫാത്തിമ മാതാ കോളജ്, ശ്രീ നാരായണ കോളജ്എന്നിവിടങ്ങളിലായിരുന്നു വിദ്യാഭ്യാസം. കോളജില് പഠനകാലത്ത് കൊല്ലം ജില്ലാ ഫുട്ബോള് ടീം ക്യാപ്റ്റനായിരുന്നു.
1978ല് ഇറങ്ങിയ നിത്യവസന്തം ആയിരുന്നു ആദ്യ സിനിമ. പിന്നാലെ എ.ബി. രാജിന്റെ കഴുകന്, ചന്ദ്രകുമാറിന്റെ അഗ്നിപര്വതം, കരിമ്പന, രജനീഗന്ധി, ആറാം തമ്പുരാന്, ഗോഡ് ഫാദര് തുടങ്ങി ഒട്ടനവധി ചിത്രങ്ങളില് അഭിനയിച്ചു. പിന്നീട് മലയാളസിനിമയിലെ പ്രധാന വില്ലനായി മാറി കുണ്ടറ ജോണി. ഉണ്ണി മുകുന്ദന് നായകനായ മേപ്പടിയാനാണ് അവസാന ചിത്രം. മലയാളത്തിന് പുറമേ തെലുങ്കു, തമിഴ്, കന്നഡ ഭാഷകളിലെ ചില ചിത്രങ്ങളിലും ജോണി അഭിനയിച്ചു.