മുണ്ടക്കയം: യുവതിയെ കൊലപ്പെടുത്താന് ശ്രമിച്ച കേസില് യുവാവിനെ പൊലീസ് അറസ്റ്റ് ചെയ്തു. കോരുത്തോട് കോസടി ഭാഗത്ത് കുരിയിലംകാട്ടില് വീട്ടില് ഡെന്നീസ് ദേവസ്യ (31) എന്നയാളെയാണ് മുണ്ടക്കയം പൊലീസ് അറസ്റ്റ് ചെയ്തത്. ഇയാള് കാഞ്ഞിരപ്പള്ളി സ്വദേശിനിയായ യുവതിയുമായി സൗഹൃദത്തില് ആവുകയും തുടര്ന്ന് വിവാഹ വാഗ്ദാനം നല്കി യുവതിയെ പീഡിപ്പിക്കുകയുമായിരുന്നു. യുവതിയുടെ സ്വകാര്യ ചിത്രങ്ങള് ഇയാള് മൊബൈലില് പകര്ത്തുകയും ചെയ്തു.
തുടര്ന്ന് യുവതി ഇയാളുമായുള്ള സൗഹൃദത്തില് നിന്നും പിന്മാറിയതിനെ തുടര്ന്നുണ്ടായ വിരോധം മൂലം ഇയാള് യുവതിയെ ചിത്രങ്ങള് കാണിച്ചു ഭീഷണിപെടുത്തി. ചൊവ്വാഴ്ച രാത്രി എട്ടു മണിയോടുകൂടി തന്റെ താമസസ്ഥലത്തേക്ക് വിളിച്ചുവരുത്തി കയ്യില് കരുതിയിരുന്ന വാക്കത്തി കൊണ്ട് വെട്ടുകയായിരുന്നു. തുടര്ന്ന് ഇയാള് സംഭവസ്ഥലത്തു നിന്ന് കടന്നു കളഞ്ഞു. പരാതിയെ തുടര്ന്ന് കേസ് റജിസ്റ്റര് ചെയ്ത മുണ്ടക്കയം പൊലീസ് ഇയാളെ പിടികൂടുകയായിരുന്നു. ഇയാള്ക്കെതിരെ കട്ടപ്പന പൊലീസ് സ്റ്റേഷനില് പോക്സോ കേസ് നിലവിലുണ്ട്. കോടതിയില് ഹാജരാക്കിയ ഇയാളെ റിമാന്ഡ് ചെയ്തു.