തിരുവനന്തപുരം: മുന് മുഖ്യമന്ത്രിയും കോണ്ഗ്രസ് നേതാവുമായ ഉമ്മന്ചാണ്ടിയുടെ വിയോഗത്തോടെ ഒഴിവ് വന്ന പുതുപ്പള്ളിയിലെ ഉപതെരഞ്ഞെടുപ്പ് ചര്ച്ചകളിലേക്ക്. ചാണ്ടി ഉമ്മനെ കോണ്ഗ്രസ് കളത്തിലിറക്കുമോ എന്നാണ് രാഷ്ട്രീയ കേരളം ഉറ്റുനോക്കുന്നത്. ഉപതെരഞ്ഞെടുപ്പ് വൈകാനിടയില്ലെന്ന് വിലയിരുത്തുന്ന സിപിഎമ്മിന്റെ ആദ്യപരിഗണനയില് ജെയ്ക്ക് സി തോമസാണുള്ളത്.
1970 ല് കോണ്ഗ്രസിന്റെ കടുത്ത പ്രതിസന്ധി കാലത്താണ് പുതുപ്പള്ളിയെ ഉമ്മന്ചാണ്ടിയും ഉമ്മന്ചാണ്ടിയെ പുതുപ്പള്ളിയും ഏറ്റെടുക്കുന്നത്. പിന്നീടങ്ങോട്ട് 12 തവണയും പുതുപ്പള്ളിക്ക് ഒരേ ഒരു തെരഞ്ഞെടപ്പേ ഉണ്ടായിട്ടുള്ളു. ഉമ്മന്ചാണ്ടിയുടെ വിയോഗ ശേഷം ഇനിയാരെന്നാണ് ചോദ്യം. ഉപതെരഞ്ഞെടുപ്പ് ചര്ച്ചകള്ക്ക് കളം പാകമായില്ലെന്ന് വിശ്വസിക്കുന്ന കോണ്ഗ്രസ് നേതാക്കളോ ഉമ്മന് ചാണ്ടിയുടെ കുടുംബാംഗങ്ങളോ ഇക്കാര്യത്തില് ഒരു പ്രതികരണത്തിനും ഇതുവരെ തയ്യാറായിട്ടില്ലെങ്കിലും ചര്ച്ചകള് സജീവമാണ്. സമീപകാല ഉപതെരഞ്ഞെടുപ്പുകളുടെ ചരിത്രം നോക്കിയാല് കോണ്ഗ്രസിന്റെ പ്രഥമ പരിഗണന കുടുംബാംഗങ്ങള്ക്ക് തന്നെയാണ്. സാധ്യതാ ചര്ച്ചകളില് മുന്നില് മകന് ചാണ്ടി ഉമ്മനുണ്ട്. വിലാപയാത്രയിലുടനീളം ഉമ്മന്ചാണ്ടിക്ക് കിട്ടിയ ജനസ്വീകാര്യത പുതുപ്പള്ളിക്ക് പുറത്തും പാര്ട്ടിക്കരുത്താക്കാന് ശ്രമിക്കുന്ന കോണ്ഗ്രസ്, ഉമ്മന്ചാണ്ടിയുടെ കുടുംബത്തിന് പുറത്ത് നിന്നൊരു സ്ഥാനാര്ത്ഥിയെ കണ്ടെത്താനുള്ള സാധ്യത തീരെയില്ല.
തെരഞ്ഞെടുപ്പ് വൈകില്ലെന്ന വിലയിരുത്തലിലാണ് സിപിഎം. അടുത്ത മാസം ആദ്യം നടക്കുന്ന നേതൃയോഗങ്ങള്ക്ക് ശേഷം തെരഞ്ഞെടുപ്പ് ഒരുക്കങ്ങള് സജീവമാക്കാനാണ് പാര്ട്ടി ധാരണ.