എറണാകുളം: എറണാകുളം മഹാരാജാസ് കോളേജില് അധ്യാപകനെ അപമാനിച്ച സംഭവത്തില് പ്രതികരണവുമായി അധ്യാപകന് ഡോക്ടര് പ്രിയേഷ്. കുട്ടികളുടെ നടപടി വേദനിപ്പിച്ചു എന്ന് ഡോക്ടര് പ്രിയേഷ് പറഞ്ഞു. തനിക്ക് കാഴ്ചപരിമിതി ഉള്ളതുകൊണ്ടല്ലേ ഇങ്ങനെ ചെയ്തതെന്നാണ് പ്രിയേഷിന്റെ ചോദ്യം. മറ്റു അധ്യാപകരുടെ ക്ലാസ്സുകളില് ഇങ്ങനെ ചെയ്യില്ലായിരുന്നു. കുട്ടികള് തെറ്റു മനസ്സിലാക്കണം. അതിനാണ് പരാതി നല്കിയതെന്നും പ്രിയേഷ് പറഞ്ഞു.
അധ്യാപകനെ അപമാനിച്ച സംഭവത്തില് ആറ് വിദ്യാര്ത്ഥികളെ സസ്പെന്ഡ് ചെയ്തിരുന്നു. കെഎസ്യു യൂണിറ്റ് വൈസ് പ്രസിഡന്റ് ഫാസില് അടക്കം ആറ് പേരെയാണ് സസ്പെന്ഡ് ചെയ്തത്. പൊളിറ്റിക്കല് സയന്സ് അധ്യാപകനായ പ്രിയേഷിനെയാണ് വിദ്യാര്ത്ഥികള് അപമാനിച്ചത്. ക്ലാസ് നടക്കുമ്പോള് കളിച്ചും ചിരിച്ചും അനുവാദമില്ലാതെ പ്രവേശിക്കുകയും ചെയ്തു. ഇവ വീഡിയോയായി ചിത്രീകരിച്ച് പ്രചരിപ്പിച്ച സംഭവത്തിലാണ് കോളേജിന്റെ നടപടി.