തിരുവനന്തപുരം: സിനിമക്ക് ടിക്കറ്റെടുത്ത് തിയേറ്ററില് കയറും. സിനിമ തുടങ്ങിക്കഴിഞ്ഞാല് പകുതി വസ്ത്രമഴിച്ച് കളഞ്ഞ് മുട്ടിലിഴഞ്ഞ് നടന്ന് തിയേറ്ററിലുള്ളവരുടെ പേഴ്സ് മോഷ്ടിക്കും. സിസിടിവിയില് കണ്ടെത്തിയ കള്ളനുവേണ്ടി പോലീസ് അന്വേഷണം ആരംഭിച്ചു. തിരുവനന്തപുരം ആറ്റിങ്ങല് ഗംഗ തിയേറ്ററില് സിനിമ കാണാന് വന്നവരുടെ പേഴ്സ് നഷ്ടപ്പെട്ടതുമായി ബന്ധപ്പെട്ട് നടത്തിയ അന്വേഷണത്തിലാണ് കള്ളന് സിസിടിവിയില് കുടുങ്ങിയത്.
ആദ്യം ടിക്കറ്റെടുത്ത് തിയേറ്ററില് ആളൊഴിഞ്ഞ ഭാഗത്ത് കയറിയിരിക്കും, സിനിമ തുടങ്ങിക്കഴിഞ്ഞാല് അര്ധനഗ്നനായി മുട്ടിലിഴഞ്ഞ് നടന്ന് മോഷണം നടത്തും. സിനിമയില് ലയിച്ചിരിക്കുന്നവര് മോഷണവിവരം അറിയുകയുമില്ല. ഈ ദൃശ്യങ്ങള് തിയേറ്റര് അധികൃതര് പൊലീസിന് കൈമാറി. പണം നഷ്ടപ്പെട്ടത് സംബന്ധിച്ച് ആരും ഇതുവരെ പരാതികളൊന്നും നല്കിയിട്ടില്ലെന്ന് പോലീസ് വ്യക്തമാക്കി. തിയേറ്ററില് നിന്ന് ലഭിച്ച ദൃശ്യങ്ങളുടെ അടിസ്ഥാനത്തില് പ്രതിക്കായുള്ള തെരച്ചില് നടന്ന് വരികയാണെന്ന് ഇന്സ്പെക്ടര് മുരളീ കൃഷ്ണ അറിയിച്ചു.