ഉജ്ജയിന്: മധ്യപ്രദേശിലെ ഉജ്ജയിനില് ബലാത്സംഗം ചെയ്യപ്പെട്ട 12 വയസുകാരി രക്തം വാര്ന്ന നിലയില് ഉടുവസ്ത്രമില്ലാതെ റോഡിലൂടെ സഹായം തേടി അലഞ്ഞു. ഒടുവില് സമീപവാസിയായ സന്യാസിയാണ് പെണ്കുട്ടിയെ ആശുപത്രിയില് എത്തിച്ചത്.
വീടുകള് തോറും കയറിയിറങ്ങി പെണ്കുട്ടി സഹായത്തിനായി കേഴുന്ന ദൃശ്യം സിസിടിവി ക്യാമറകളില് പതിഞ്ഞു. ആളുകള് പെണ്കുട്ടിയെ തുറിച്ചുനോക്കുകയാണ് ചെയ്തത്. ആരും സഹായിക്കാന് തയ്യാറായില്ല. ചിലരാകട്ടെ പെണ്കുട്ടിയെ ആട്ടിയോടിച്ചു. മധ്യപ്രദേശിലെ ഉജ്ജയിനില് നിന്ന് 15 കിലോമീറ്റര് അകലെ ബദ്നഗര് റോഡിലാണ് മനുഷ്യ മനസാക്ഷിയെ ഞെട്ടിക്കുന്ന സംഭവമുണ്ടായത്.
പെണ്കുട്ടി ഒടുവില് ഒരു ആശ്രമത്തിലെത്തി. അവിടെയുള്ള സന്യാസി ധരിക്കാന് വസ്ത്രം നല്കി. അദ്ദേഹം ഉടനെ പെണ്കുട്ടിയെ ആശുപത്രിയില് എത്തിച്ചു. വൈദ്യപരിശോധനയില് പെണ്കുട്ടി ബലാത്സംഗം ചെയ്യപ്പെട്ടതായി സ്ഥിരീകരിച്ചു.