കോട്ടയം: പുതുപ്പള്ളി ഉപതെരഞ്ഞെടുപ്പില് യുഡിഎഫ് സ്ഥാനാര്ത്ഥിയായ ചാണ്ടി ഉമ്മന് നാമനിര്ദേശ പത്രികയ്ക്ക് ഒപ്പം കെട്ടിവയ്ക്കാനുള്ള പണം നല്കുന്നത് സിഒടി നസീറിന്റെ അമ്മയെന്ന് റിപ്പോര്ട്ട്. പാമ്പാടിയിലെ യുഡിഎഫ് കേന്ദ്ര തെരഞ്ഞെടുപ്പ് കമ്മിറ്റി ഓഫീസില് വച്ചാണ് തുക കൈമാറുക. ഉമ്മന്ചാണ്ടി മുഖ്യമന്ത്രിയായിരിക്കെ കണ്ണൂരില് സിപിഎം പ്രവര്ത്തകര് കാര് തടഞ്ഞ് കല്ലെറിഞ്ഞ സംഭവത്തില് പ്രതിയായ തലശ്ശേരിയിലെ മുന് സിപിഎം പ്രവര്ത്തകന് സിഒടി നസീറിന്റെ അമ്മയാണ് പണം നല്കുക. കേസ് നടക്കുന്നതിനിടെ പ്രതികള്ക്ക് അനുകൂലമായ നിലപാട് ഉമ്മന്ചാണ്ടി എടുത്തിരുന്നു.
തൃക്കാക്കര മോഡല് പ്രചാരണ തന്ത്രമാണ് പുതുപ്പള്ളിയിലും യുഡിഎഫ് ആസൂത്രണം ചെയ്യുന്നത്. പഴുതടച്ചുള്ള പ്രവര്ത്തനങ്ങളിലൂടെ ഉയര്ന്ന ഭൂരിപക്ഷം ഉറപ്പിക്കുകയാണ് ലക്ഷ്യം. ചെറുപ്പക്കാര് മുതല് മുതിര്ന്ന നേതാക്കള് വരെ പ്രചാരണത്തിന്റെ മുന്പന്തിയിലുണ്ടാകും. പുതുപ്പള്ളി പ്രചാരണത്തിന്റെ തലപ്പത്ത് പ്രതിപക്ഷ നേതാവ് വി ഡി സതീശനാണുള്ളത്. തൊട്ടുതാഴെ ഇടതും വലതുമായി തിരുവഞ്ചൂര് രാധാകൃഷ്ണനും കെ സി ജോസഫും, ഇങ്ങനെയാണ് യുഡിഎഫിന്റെ പുതുപ്പള്ളി പ്രചാരണത്തിന്റെ ഒന്നാം പേജ്.