ചൈനയില്‍ തുടര്‍ച്ചയായി പത്ത് മിനിറ്റ് കാമുകിയെ ചുംബിച്ച യുവാവിന്റെ കേള്‍വിശക്തി നഷ്ടപ്പെട്ടതായി റിപ്പോര്‍ട്ട്. ചൈനീസ് വാലന്റൈന്‍സ് ഡേ ആയ ഓഗസ്റ്റ് 22ന് ഷെജിയാംഗ് ജില്ലയിലെ വെസ്റ്റ് ലേക്കില്‍ ഡേറ്റിന് പോയതായിരുന്നു കമിതാക്കള്‍. ഇവിടെ വച്ച് കാമുകിയെ ചുംബിക്കവെ യുവാവ് ചെവിയില്‍ നിന്ന് കുമിളകളുടെ ശബ്ദം കേള്‍ക്കുകയും പിന്നാലെ കടുത്ത ചെവി വേദന അനുഭവപ്പെടുകയും ചെയ്യുകയായിരുന്നു.
തൊട്ടുപിന്നാലെ യുവാവിനെ ആശുപത്രിയില്‍ എത്തിച്ചു. യുവാവിന്റെ കര്‍ണപുടം തകര്‍ന്നതായി ഡോക്ടേഴ്സ് കണ്ടെത്തി. കേള്‍വിശക്തി തിരികെ ലഭിക്കാന്‍ രണ്ട് മാസം സമയമെടുക്കുമെന്നാണ് വിദഗ്ധര്‍ പറയുന്നത്.
ചുംബിക്കുന്നത് ചെവിയിലെ വായു സമ്മര്‍ദത്തില്‍ മാറ്റം വരുത്തുമെന്നും ഒപ്പം പങ്കാളിയുടെ വലിയ നിശ്വാസങ്ങള്‍ കൂടിയാകുമ്പോള്‍ കര്‍ണപുടത്തെ ബാധിക്കുമെന്നും ആരോഗ്യ വിദഗ്ധര്‍ പറഞ്ഞതായി സൗത്ത് ചൈന മോണിംഗ് പോസ്റ്റ് റിപ്പോര്‍ട്ട് ചെയ്തു.