അബ്ഹ: സൗദിയിലെ അബ്ഹയിലുണ്ടായ വാഹനാപകടത്തില് മലയാളി യുവാവ് മരിച്ചു. അല്സുദ- ഷഹ്ബയിന് റോഡിലെ ചുരത്തില് വാഹനം നിയന്ത്രണം വിട്ട് സൈഡ് വാളില് ഇടിച്ചുണ്ടായ അപകടത്തില് കോഴിക്കോട് കൊടിയത്തൂര് ചെറുവാടി സ്വദേശി അക്കരപറമ്പില് ഹാരിസാണ് (35) മരിച്ചത്. അബ്ഹയില്നിന്ന് മജാരിദയിലേക്കുള്ള യാത്രക്കിടയിലായിരുന്നു അപകടം.
അബ്ഹയിലെ ഖാലിദിയ്യ ജംഇയ്യത്തുല് മനാസില് എന്ന സ്ഥാപനത്തില് ജോലി ചെയ്യുന്ന ഹാരിസ് ചെറുവാടിയും സഹപ്രവര്ത്തകരും ജോലിയുടെ ഭാഗമായി മജാരിദയിലേക്ക്പോകുകയായിരുന്നു. യാത്രക്കിടയില് വാഹനത്തിന്റെ ബ്രേക്ക് നഷ്ടപ്പെട്ട് നിയന്ത്രണം വിട്ടാണ് അപകടം.
ഹാരിസ് സംഭവസ്ഥലത്ത് തന്നെ മരിച്ചു കൂടെ ഉണ്ടായിരുന്ന മലപ്പുറം വാഴക്കാട് സ്വദേശി ഫജ്റു സാദിഖ്, കോഴിക്കോട് മുക്കം സ്വദേശി മുജീബ് എന്നിവര്ക്ക് പരിക്കേറ്റു. ഇരുവരെയും ആശുപത്രിയില് പ്രവേശിപ്പിച്ചു. മൂന്നുപേരും ഒരേ സ്ഥാപനത്തില് ജോലി ചെയ്യുന്നവരാണ്.