പാലക്കാട് : പട്ടാമ്പിയിൽ കോവിഡ് നിയന്ത്രണങ്ങൾ കാറ്റിൽപ്പറത്തി വിദ്യാർത്ഥികളുടെ ഡി.ജെ പാർട്ടി. പട്ടാമ്പി സർക്കാർ സംസ്കൃത കോളേജിലാണ് കോവിഡ് നിയന്ത്രണങ്ങൾ പാലിക്കാതെ ഡി.ജെ. പാർട്ടി നടത്തിയത്.
അഞ്ഞൂറിലേറെ പേരാണ് പാർട്ടിയിൽ പങ്കെടുത്തത്. സംഭവത്തിൽ കോളേജ് പ്രിൻസിപ്പാളിനും വിദ്യാർഥികൾക്കുമെതിരെ പട്ടാമ്പി പോലീസ് കേസെടുത്തു.
ചൊവ്വാഴ്ച രാവിലെ 11 മണിയോടെയാണ് പരിപാടി ആരംഭിച്ചത്. പരിപാടിക്ക് അനുമതി നൽകിയിട്ടില്ലെന്ന് പട്ടാമ്പി പോലീസ് വ്യക്തമാക്കി.
പാർട്ടിയിൽ പങ്കെടുത്തവരാരും മാസ്ക് ധരിക്കുകയോ സാമൂഹിക ആകലം പാലിക്കുകയോ ചെയ്തിരുന്നില്ല. കഴിഞ്ഞ ദിവസത്തെ പാലക്കാട്ടെ രോഗ സ്ഥിരീകരണ നിരക്ക് 31.08 ശതമാനമാണ്.
പട്ടാമ്പി ഗവൺമെന്റ് സംസ്കൃത കോളേജിലെ അവസാന വർഷ വിദ്യാർഥികളുടെ നേതൃത്വത്തിലായിരുന്നു പരിപാടി സംഘടിപ്പിച്ചത്.
പരിപാടി മാറ്റിവെക്കണമെന്ന് ഒരു വിഭാഗം അധ്യാപകർ ആവശ്യപ്പെട്ടെങ്കിലും വിദ്യാർഥികൾ അതിന് വഴങ്ങിയില്ല.