റോഡിലിറങ്ങിയാല്‍ സര്‍വ നിയങ്ങളും കാറ്റില്‍ പറത്തുന്ന ഡ്രൈവര്‍മാര്‍ കരുതിയിരുന്നോ, ഇനിയെല്ലാം ക്യാമറയില്‍ പതിയും. പിന്നാലെ നിയമത്തിന്റെ പിടിവീഴും.
സംസ്ഥാനത്ത് ദേശീയ, സംസ്ഥാന പാതകളിലും പ്രധാനറോഡുകളിലും സ്ഥാപിച്ച ക്യാമറകളില്‍ 90 ശതമാനവും ഏപ്രില്‍ ഒന്നുമുതല്‍ പ്രവര്‍ത്തിച്ചുതുടങ്ങും. ഇതോടെ, അപകടങ്ങള്‍ വലിയ തോതില്‍ കുറക്കാന്‍ കഴിയുമെന്നാണ് വിലയിരുത്തല്‍.
235കോടി രൂപ ചെലവില്‍ 726 ക്യാമറകളാണ് മോട്ടോര്‍ വാഹനവകുപ്പിനു കെല്‍ട്രോണ്‍ കൈമാറിയിരിക്കുന്നത്. ഹെല്‍മെറ്റ്, സീറ്റ്ബെല്‍റ്റ് എന്നിവ ധരിക്കാതെ വാഹനമോടിക്കുക, വണ്ടിയോടിക്കുമ്ബോള്‍ മൊബൈലില്‍ സംസാരിക്കുക, ഇരുചക്രവാഹനങ്ങളില്‍ മൂന്നുപേര്‍ യാത്രചെയ്യുക, അപകടകരമായി ഓടിക്കല്‍ എന്നിവ പിടികൂടാനാണ് 700 നിര്‍മ്മിത ബുദ്ധി ക്യാമറകള്‍. മൂന്നിലെ രണ്ടുപേരും സീറ്റ് ബെല്‍റ്റ് ധരിച്ചില്ലെങ്കിലും ക്യാമറ പിടിക്കും. ഇതെപോലെ ഹെല്‍മെറ്റും.
അമിതവേഗം പിടികൂടാനായി രണ്ടെണ്ണം തിരുവനന്തപുരം ബൈപ്പാസില്‍ ചാക്കയിലും ഇന്‍ഫോസിസിന്‍റെ മുന്നിലും രണ്ടെണ്ണം കൊല്ലം ബൈപ്പാസിലും സിഗ്നലുകള്‍ തെറ്റിക്കുന്നവര്‍ക്കായി ജംങ്ഷനുകളില്‍ 18 ക്യാമറകളും തയ്യാറാണ്. മോട്ടോര്‍ വാഹനവകുപ്പപിന്‍റെ വാഹനത്തില്‍ സ്വയം പ്രവര്‍ത്തിക്കുന്ന നാലുക്യാമറ സംവിധാനങ്ങളുണ്ടാവും. റോഡരികില്‍ നിര്‍ത്തിയിട്ട വാഹനത്തിലെ ക്യാമറ അതിവേഗത്തില്‍ പോകുന്ന വണ്ടിയുടെ ചിത്രങ്ങള്‍ സഹിതം വിവരങ്ങള്‍ കണ്‍ട്രോള്‍റൂമിലേക്ക് അയക്കും. നിലവില്‍ മോട്ടോര്‍ വാഹനവകുപ്പിനുള്ളള ക്യാമറകള്‍ പ്രവര്‍ത്തിപ്പിക്കാന്‍ ഒരാള്‍ വേണം.
വാഹനത്തില്‍ ഘടിപ്പിക്കുന്ന ക്യാമറകള്‍ ഒഴികെയുള്ളവയെല്ലാം പ്രവര്‍ത്തിക്കുന്നത് സൗര്‍ജോര്‍ജത്തിലാണ്. 4ജി കണക്ടിവിറ്റി സിമ്മിലാണ് കൈമാറ്റം. എല്ലാ വാഹനങ്ങളെലും ക്യാമറ ബോക്സിലുള്ള വിഷ്വല്‍ പ്രൊസസിങ് യൂണിറ്റ് വിശകലനം ചെയ്യും. ചിത്രങ്ങളും പകര്‍ത്തും. ഗതാഗതനിയമം ലംഘിച്ച വണ്ടികളുടെ ചിത്രവും ആളിന്‍റെ ഫോട്ടോയും മോട്ടോര്‍ വാഹനവകുപ്പിന്‍റെ കണ്‍ട്രോള്‍റൂമിലേക്ക് അയക്കും. ആറുമാസത്തെ ദൃശ്യങ്ങള്‍ ശേഖരിക്കാന്‍ ഇതില്‍ സംവിധാനമുണ്ട്. ഓരോവര്‍ഷം കഴിയും തോറും റോഡപകടങ്ങള്‍ വര്‍ധിക്കുന്ന സാഹചര്യത്തില്‍ പുതിയ ക്യാമറ സംവിധാനം ഏറെ ഗുണം ചെയ്യുമെന്നാണ് വിലയിരുത്തല്‍.