മുല്ലപ്പെരിയാറില് പുതിയ അണക്കെട്ട് പണിയുമെന്ന് ഗവര്ണര് ആരിഫ് മുഹമ്മദ് ഖാൻ. നയപ്രഖ്യാപന പ്രസംഗത്തിലാണ് ഗവര്ണര് ഇക്കാര്യം വ്യക്തമാക്കിയത്. തമിഴ്നാടുമായി ചര്ച്ച തുടരുമെന്നും ഗവര്ണര് വ്യക്തമാക്കി.
കൊവിഡ് പ്രതിരോധത്തിലെ സര്ക്കാര് നേട്ടങ്ങള് എണ്ണിപ്പറഞ്ഞുകൊണ്ടാണ് ഗവര്ണര് നയപ്രഖ്യാപന പ്രസംഗം ആരംഭിച്ചത്. കൊവിഡിനെ പ്രതിരോധിക്കാന് കഴിഞ്ഞത് ആശ്വാസമാണെന്ന് ഗവര്ണര് ചൂണ്ടിക്കാട്ടി. സൗജന്യമായി വാക്സിന് നല്കാനായെന്നും ഗവര്ണര് പറഞ്ഞു. കൊവിഡ് പോരാളികള്ക്കും അദ്ദേഹം അഭിവാദ്യമര്പ്പിച്ചു.
18 വയസിന് മുകളിലുള്ള നൂറ് ശതമാനം പേര്ക്കും വാക്സിന് നല്കാനായി. നീതി ആയോഗ് കണക്കുകളില് മികച്ച പ്രകടനമാണ് കേരളത്തിന്റേത്. ആരോഗ്യ മേഖലയില് കേരളം മുന്നിലാണെന്ന് ഗവര്ണര് നയപ്രഖ്യാപന പ്രസംഗത്തില് പറഞ്ഞു.
നൂറുദിന കര്മ പരിപാടി മാതൃകാപരമാണെന്നും നിരവധി പദ്ധതികള് സമയപരിധിക്കുള്ളില് പൂര്ത്തിയാക്കിയെന്നും ഗവര്ണര് പറഞ്ഞു. 2011 ലെ ഭവന നിര്മാണ നിയമം പരിഷ്കരിക്കുമെന്നും ഹൗസിംഗ് പോളിസിയില് മാറ്റം വരുത്തുമെന്നും ഗവര്ണര് പ്രഖ്യാപിച്ചു.
സര്ക്കാര് സേവനങ്ങള് എളുപ്പത്തില് ലഭിക്കാന് നടപടികള് ആവിഷ്കരിച്ചുവെന്നും ഗവര്ണര് വ്യക്തമാക്കി. ഇന്ന് രാവിലെ 9 മണിയോടെയാണ് ഗവര്ണര് ആരിഫ് മുഹമ്മദ് ഖാന് നയപ്രഖ്യാപന പ്രസംഗം ആരംഭിച്ചത്. ഗവര്ണര് സഭയിലെത്തിയതോടെ ‘ഗോ ബാക്ക്’ മുഴക്കിയ പ്രതിപക്ഷം ഗവര്ണര് നയപ്രഖ്യാപന പ്രസംഗം ആരംഭിച്ചതോടെ ഇറങ്ങിപ്പോവുകയായിരുന്നു.