തലസ്ഥാനത്ത് പോലീസിന് നേരെ ആക്രമണം. ശിങ്കാരത്തോപ്പ് കോളനിയില്‍ വച്ചാണ് ആക്രമണം ഉണ്ടായത്. തിരുവനന്തപുരം ഫോര്‍ട്ട് സി.ഐ ജെ. രാകേഷിനാണ് മര്‍ദനമേറ്റത്.
മദ്യ ലഹരിയില്‍ ബഹളമുണ്ടാക്കിയവരെ പിടിച്ചു മാറ്റാനുള്ള ശ്രമത്തിനിടെയാണ് സിഐക്ക് മര്‍ദനമേറ്റതെന്നാണ് വിവരം. തലയ്ക്ക് അടിയേറ്റ സി.ഐയെ ആശുപത്രിയില്‍ പ്രവേശിപ്പിച്ചു.
ഇന്നലെ അര്‍ധരാത്രിയോടെയാണ് സംഭവം നടന്നത്. ശിങ്കാരത്തോപ്പ് കോളനില്‍ പതിവായി മദ്യപാന സംഘം എത്താറുണ്ട്. ഇവിടെ ചെറിയ സംഘര്‍ഷമുണ്ടെന്നറിഞ്ഞാണ് ഫോര്‍ട്ട് സിഐയുടെ നേതൃത്വത്തിലുള്ള സംഘം ഈ പ്രദേശത്തേക്ക് എത്തിയത്.
മദ്യപാനസംഘത്തെ പിന്തിരിപ്പിക്കുന്നതിനിടയിലാണ് സിഐക്ക് മര്‍ദനമേറ്റത്. സി.ഐ ജെ. രാകേഷിന്റെ തലയ്ക്കും കഴുത്തിനുമാണ് അടിയേറ്റത്. ചികിത്സയ്ക്ക് ശേഷം സിഐ രാവിലെയോടെ ആശുപത്രി വിട്ടതായാണ് വിവരം.
സംഭവവുമായി ബന്ധപ്പെട്ട് രണ്ട് പേരുടെ അറസ്റ്റ് രേഖപ്പെടുത്തിയിട്ടുണ്ട്. കൂടുതല്‍ പേര്‍ കേസില്‍ ഉള്‍പ്പെട്ടിട്ടുണ്ടെന്നാണ് നിലവിലെ വിവരം. അവരുടെ അറസ്റ്റ് കൂടി വൈകാതെ രേഖപ്പെടുത്തിയേക്കും.
നേരത്തെയും ശിങ്കാരത്തോപ്പ് കേന്ദ്രീകരിച്ച് അക്രമസംഭവങ്ങള്‍ ഉണ്ടായിട്ടുണ്ട്. അതുകൊണ്ട് തന്നെ അതീവഗൗരവത്തോടെയാണ് പോലീസ് ഈ വിഷയത്തെ നോക്കിക്കാണുന്നത്.