തെറ്റിദ്ധാരണ പരത്തുന്ന ഓണ്ലൈന് പേജുകള്ക്കെതിരെ രൂക്ഷവിമര്ശനവുമായി നടി മംമ്ത മോഹന്ദാസ്. രോഗം മൂര്ദ്ധന്യാവസ്ഥയിലാണെന്നും താന് മരിക്കാന് പോകുകയാണെന്നുമുള്ള തരത്തില് വാര്ത്ത പ്രചരിപ്പിച്ച പേജിനെതിരെയാണ് നടി രംഗത്തെത്തിയത്. തെറ്റിദ്ധാരണ പരത്തി വൈറലാകാന് ശ്രമിക്കുകയാണ് ഇത്തരം പേജുകളെന്നും താരം ചൂണ്ടിക്കാട്ടുന്നു.
”ഇനി പിടിച്ചു നില്ക്കാന് കഴിയില്ല, ഞാന് മരണത്തിനു കീഴടങ്ങുന്നു, പ്രിയ നടി മംമ്ത മോഹന്ദാസിന്റെ ദുരിത ജീവിതം ഇങ്ങനെ” എന്ന തലക്കെട്ടോടെ വന്ന വാര്ത്തയ്ക്കെതിരെയാണ് മംമ്ത പ്രതികരിച്ചത്.
ഈ വാര്ത്ത ശ്രദ്ധയില്പ്പെട്ടതോടെ ഫേസ്ബുക്ക് പേജില് പോസ്റ്റിനടിയില് താരം കമന്റ് ചെയ്തു. ഗീതു നായര് എന്ന വ്യാജ പ്രൊഫൈലിലാണ് ഈ വാര്ത്ത വന്നത്.
‘നിങ്ങള് ആരാണ്? നിങ്ങള് എന്തിനെക്കുറിച്ചാണ് സംസാരിക്കുന്നത് ? പേജിനു കൂടുതല് ശ്രദ്ധ ലഭിക്കാന് എന്തും പറയാമെന്നാണോ ഞാന് വിചാരിക്കേണ്ടത്? ഇതുപോലെയുള്ള വ്യാജ പേജുകള് പിന്തുടരാതിരിക്കാന് ശ്രദ്ധിക്കുക. ഇത് വളരെ തെറ്റിദ്ധരിപ്പിക്കുന്നതാണ്.”മംമ്ത മോഹന്ദാസ് കമന്റ് ചെയ്തു.
മംമ്തയുടെ കമന്റ് വൈറലായതോടെ, രൂക്ഷമായ വിമര്ശനമാണ് പേജിനെതിരെ ഉണ്ടായത്. ഇതോടെ വാര്ത്ത പിന്വലിക്കുകയും പേജ് താല്ക്കാലികമായി ഡീആക്ടിവേറ്റ് ചെയ്യുകയും ചെയ്തു.