പട്ന: ബിഹാറിലെ കാട്ടിഹാര് ജില്ലയില് യുവതിയെ ബലാത്സംഗം ചെയ്യാന് ശ്രമിച്ചെന്നാരോപിച്ച് യുവാവിന്റെ തല മുണ്ഡനം ചെയ്ത് ചെരുപ്പുമാലയിട്ട് നടത്തിച്ച് സ്ത്രീയുടെ ബന്ധുക്കള്.
കാട്ടിഹാറിലെ കാബര് എന്ന ഗ്രാമത്തിലെ പൊടിമില്ലില് ജോലി ചെയ്ത് വരികയായിരുന്ന ആനന്ദ് എന്ന യുവാവിനെയാണ് ഒരു സംഘം ആക്രമിച്ചത്. ജോലി സ്ഥലത്തെത്തുമായിരുന്ന മില് ഉടമ രാജീവ് കുമാറിന്റെ ഭാര്യയുമായി ആനന്ദിന് സൗഹൃദമുണ്ടായിരുന്നു. ഇരുവരും പലപ്പോഴും ഫോണിലൂടെ സംസാരിക്കാറുണ്ടായിരുന്നുവെന്നാണ് റിപ്പോര്ട്ട്. എന്നാല് ആനന്ദ് തന്നെ ഏറെക്കാലമായി ശല്യം ചെയ്യുകയാണെന്നും അനാവശ്യമായി തന്നെ ഫോണ് ചെയ്യാറുണ്ടെന്നും യുവതി പറഞ്ഞതോടെയാണ് ആനന്ദിന് നേരെ ആക്രമണമുണ്ടായത്.
ആനന്ദ് തന്നെ ബലാത്സംഗം ചെയ്തുവെന്നും യുവതി ആരോപിച്ചതോടെയാണ് യുവതിയുടെ ബന്ധുക്കള് ഇയാളെ മര്ദിച്ചത്. യുവാവിനെ തൂണില് കെട്ടിയിട്ട ശേഷം ക്രൂരമായി മര്ദിക്കുകയും തലമുടിയും താടിയും മുണ്ഡനം ചെയ്തശേഷം ചെരുപ്പുമാല അണിയിക്കുകയുമായിരുന്നു.