കണ്ണൂര്‍: തലശ്ശേരിയിലെ സി.പി.എം പ്രവര്‍ത്തകനായ ഹരിദാസനെ കൊലപ്പെടുത്തിയത് നാലുപേരാണെന്നാണ് പോലീസ്്. ഇവര്‍ക്കായുള്ള അന്വേഷണം ഊര്‍ജിതമായി നടക്കുന്നുണ്ട്. ചൊവ്വാഴ്ച പുലര്‍ച്ചെവരെയും അന്വേഷണസംഘം വാഹനപരിശോധയും റെയ്ഡുകളും നടത്തിയിരുന്നു. ഉച്ചയോടെ ഇവര്‍ പിടിയിലാവുമെന്നാണ് പോലീസിന്റെ പ്രതീക്ഷ.
പ്രതികള്‍ സഞ്ചരിച്ച ബൈക്ക് ഇനിയും പോലീസിന് കണ്ടെത്താനായിട്ടില്ല. പ്രകോപന പ്രസംഗം നടത്തിയതിന് പോലീസ് കസ്റ്റഡിയിലെടുത്ത ബി.ജെ.പി കൗണ്‍സിലര്‍ ലിജേഷ് ഉള്‍പ്പടെയുള്ളവരെ ചോദ്യംചെയ്യുന്ന നടപടിയും പുരോഗമിക്കുകയാണ്.
അതേസമയം സംഭവത്തില്‍ നാല് പേരുടെ അറസ്റ്റ് പോലീസ് രേഖപ്പെടുത്തിയിട്ടുണ്ട്. നേരത്തെ കസ്റ്റഡിയിലെടുത്തവരുടെ അറസ്റ്റാണ് രേഖപ്പെടുത്തിയത്. പ്രതികള്‍ സഞ്ചരിച്ച ബൈക്ക് കണ്ടെത്താനുള്ള ശ്രമവും പോലീസ് ഊര്‍ജിതമാക്കിയിട്ടുണ്ട്.
ക്രിമിനല്‍ ഗൂഡാലോചന കുറ്റം ചുമത്തിയാണ് ഇവരുടെ അറസ്റ്റ് രേഖപ്പെടുത്തിയത്. ഇവര്‍ക്ക് കൊലപാതകത്തില്‍ നേരിട്ട് പങ്കില്ലെന്നാണ് പോലീസിന്റെ വാദം. സംഭവം നടന്നയുടന്‍ തന്നെ പ്രതികളെ കസ്റ്റഡിയിലെടുത്തിരുന്നു. പ്രദേശത്തെ ക്ഷേത്രത്തിലെ സംഘര്‍ഷത്തില്‍ പങ്കെടുത്തവരാണ് ഇവര്‍. കൊലപാതകത്തിന്റെ ഗൂഡാലോചനയില്‍ ഇവര്‍ക്ക് പങ്കുണ്ടെന്നാണ് പോലീസ് കരുതുന്നത്.