സെലിബ്രിറ്റികളെല്ലാം വിലയേറിയ ഫാന്‍സി ഭക്ഷണരീതിയാണ് പിന്തുടരുന്നതെന്നാണ് പൊതുവേ കരുതപ്പെടുന്നത്. എന്നാല്‍ ഇത് തെറ്റാണെന്ന് ബോളിവുഡിന്റെ കിങ് ഷാറുഖ് ഖാന്റെ ഭക്ഷണരീതി കേട്ടാല്‍ മനസ്സിലാകും. വളരെ ലളിതമാണ് നടന്റെ ഭക്ഷണം.
ദിവസം രണ്ടുതവണ മാത്രമാണ് ഷാറുഖ് ഭക്ഷണം കഴിക്കുന്നത്, ഉച്ചഭക്ഷണവും അത്താഴവും. മുളപ്പിച്ച പയറുകള്‍, ഗ്രില്‍ഡ് ചിക്കന്‍, ബ്രോക്കോളി, ചിലപ്പോള്‍ അല്‍പം പരിപ്പ് എന്നിവയാണ് വിഭവങ്ങള്‍. അടുത്തിടെ ‘ജവാന്‍’ എന്ന സിനിമയില്‍ ഷാറുഖിന്റെ സിക്‌സ് പാക്ക് ശരീരം ഏറെ അഭിനന്ദനം നേടിയിരുന്നു. എന്നാല്‍, വെറും രണ്ടു നേരം ഭക്ഷണം കഴിച്ച് എങ്ങനെ ശരീരം ഇതേപോലെ ആക്കിയെടുക്കാന്‍ കഴിയും എന്നാണ് പലരുടെയും സംശയം. മാത്രമല്ല, പുകവലി ശീലമുള്ള ആളാണ് ഷാറുഖ്. ധാരാളം കോഫിയും കുടിക്കും. ഇത്തരം അനാരോഗ്യകരമായ ശീലങ്ങള്‍ ഉണ്ടായിരുന്നിട്ടും എങ്ങനെയാണ് നടന് ഇതൊക്കെ സാധിക്കുന്നത് എന്നും ആളുകള്‍ കമന്റ് ചെയ്തിട്ടുണ്ട്.