പീഡന ദൃശ്യം ചോര്ന്ന സംഭവത്തില് രാഷ്ട്രപതിയ്ക്കും പ്രധാനമന്ത്രിയ്ക്കും സുപ്രീംകോടതിയ്ക്കും ആക്രമിക്കപ്പെട്ട നടി പരാതി നൽകി. സംഭവത്തിൽ അന്വേഷണം ആവശ്യപ്പെട്ട് നടി സുപ്രീം കോടതി ചീഫ് ജസ്റ്റിസ്സിന് കത്ത് നല്കിയിട്ടുണ്ട്. അനുമതിയില്ലാതെ ദൃശ്യം തുറന്നത് ഞെട്ടിക്കുന്ന സംഭവമാണെന്ന് കത്തില് പറയുന്നു. സംഭവത്തില് നടി ആശങ്ക പ്രകടിപ്പിച്ചു. ദൃശ്യം ചോര്ന്നതോടെ തന്റെ സ്വകാര്യത ഹനിക്കപ്പെട്ടെന്നും നടി പറഞ്ഞു.
പീഡനദൃശ്യങ്ങള് ചോര്ന്നുവെന്ന വാര്ത്തയെ തുടര്ന്നാണ് നടി സുപ്രീംകോടതിയെ സമീപിച്ചത്. പ്രധാനമന്ത്രി നരേന്ദ്രമോദിക്കും മുഖ്യമന്ത്രി പിണറായി വിജയനും മനുഷ്യാവകാശ കമ്മീഷന് ഉള്പ്പെടെയുള്ളവര്ക്കും ഇവർ പരാതി കൈമാറി. അടിയന്തിര നടപടി ആവശ്യപ്പെട്ടാണ് കത്ത്.
കോടതിയില് നിന്നും നീതി ലഭിക്കുമെന്ന് പ്രതീക്ഷിച്ച തനിക്ക് കടുത്ത അനീതിയാണ് നേരിട്ടതെന്നും നടി വ്യക്തമാക്കി. എറണാകുളം ജില്ലാ സെഷന്സ് കോടതിയില് നിന്നാണ് ദൃശ്യങ്ങള് ചോര്ന്നത്. 2019 ഡിസംബര് 20നാണ് ദൃശ്യങ്ങള് ചോര്ന്നതായി വിചാരണ കോടതിയില് സ്ഥിരീകരിച്ചത്. സംസ്ഥാന ഫോറന്സിക് വിഭാഗമാണ് ഇക്കാര്യം സ്ഥിരീകരിച്ചത്.
ദൃശ്യങ്ങളുടെ ഹാഷ് വാല്യു മാറിയതിന് പിന്നാലെ നടത്തിയ പരിശോധനയിലാണ് ഇക്കാര്യം കണ്ടെത്തിയത്. ഇത് സംബന്ധിച്ച് റിപ്പോര്ട്ടുകള് അക്കാലയളവില് കൈമാറിയിരുന്നെന്നുമാണ് വിവരം. ഇതിനു പിന്നാലെ നടത്തിയ അന്വേഷണത്തിലാണ് ഇക്കാര്യം വ്യക്തമായത്. അന്വേഷണ സംഘം സീല് ചെയ്ത കവറില് കോടതിയില് സമര്പ്പിച്ച ദൃശ്യങ്ങള് എങ്ങനെയാണ് അനുമതിയില്ലാതെ മറ്റൊരാള് കണ്ടതെന്ന സംശയമാണ് ഈ ഇപ്പോൾ ഉയരുന്നത്.