എറണാകുളത്ത് കനത്ത മഴ വോട്ടെടുപ്പിനെ കാര്യമായി ബാധിച്ചു. വെള്ളം കയറിയതിനാൽ 10 ബൂത്തുകളിൽ ബദൽ സംവിധാനമൊരുക്കി. മഴ ഒഴിഞ്ഞെങ്കിലും വെള്ളക്കെട്ട് മാറാത്തതിനാൽ ബൂത്തുകളിൽ വോട്ടർമാരുടെ തിരക്കില്ല.അതേസമയം എറണാകുളത്തെ വെള്ളപ്പൊക്കം തെരഞ്ഞെടുപ്പ് കമ്മീഷൻ പരിഗണിക്കണമെന്ന് മുല്ലപ്പള്ളി രാമചന്ദ്രന്‍. എല്ലാവർക്കും വോട്ട് ചെയ്യാൻ അവസരമൊരുക്കണം. വോട്ടിങ് ശതമാനം കുറയുമെന്ന് പ്രതീക്ഷിക്കുന്നില്ല. ശുഭാപ്തി വിശ്വാസമുണ്ടെന്നും മുല്ലപ്പള്ളി പറഞ്ഞു.
പ്രതികൂല കാലാവസ്ഥ സംബന്ധിച്ച ആശങ്ക തെരഞ്ഞെടുപ്പ് കമ്മീഷനെ അറിയിച്ചിട്ടുണ്ട്. ഉചിതമായ തീരുമാനം ഉണ്ടാകുമെന്നാണ് പ്രതീക്ഷയെന്ന് പി.കെ കുഞ്ഞാലിക്കുട്ടി എം.പി പറഞ്ഞു. യു.ഡി. എഫിനെ ബാധിക്കില്ല. പരമാവധി വോട്ടർമാരെ ബൂത്തുകളിൽ എത്തിക്കാനുള്ള ശ്രമമാണ് പ്രവര്‍ത്തകർ നടത്തുന്നത്. മഞ്ചേശ്വരത്ത് ഇതുവരെയുള്ള പോളിംഗ് ആത്മവിശ്വാസം വർധിപ്പിക്കുന്നുവെന്നും കുഞ്ഞാലിക്കുട്ടി പറഞ്ഞു.