നടിയെ ആക്രമിച്ച കേസിലെ വിഐപി ശരത്തിനെ പറ്റിയുള്ള കൂടുതൽ വിവരങ്ങൾ പുറത്ത്. ദിലീപുമായി വളരെ അടുത്ത സൗഹൃദമുള്ള ശരത്ത് വളരെ പെട്ടെന്നാണ് കോടീശ്വരനായത്.
സാധാരണ കുടുംബത്തിൽ ജനിച്ച ശരത്തിന് ഇന്ന് 25 ഓളം ടൂറിസ്റ്റ് ബസുകളും ഊട്ടിയിൽ സ്വന്തമായി റിസോർട്ടും ആലുവയിൽ ഹോട്ടലുമുണ്ട്.
22 വർഷം മുമ്പാണ് ശരത്തിന്റെ കുടുംബം ആലുവയിലെത്തുന്നത്. തോട്ടുംമുഖത്തെ വാടക വീട്ടിലായിരുന്നു താമസം. പിതാവ് വിജയനാണ് ആലുവയിലെ ’നാന’ ഹോട്ടൽ ഏറ്റെടുത്തത്.
പിന്നീട് ഹോട്ടലിന്റെ പേര് ’സൂര്യ’ എന്നാക്കി. കുറെ നാൾക്ക് ശേഷമാണ് സൂര്യാ ഹോട്ടലിനൊപ്പം ട്രാവൽ‌സ് കൂടി ആരംഭിക്കുന്നത്. ടെമ്പോ ട്രാവല‌‌റാണ് ആദ്യം വാങ്ങിയത്. പിന്നെ ബസുകളും സ്വന്തമാക്കി.
ദിലീപിന്റെ യു സി കോളേജിലെ സഹപാഠിയാണ് ശരത്തിനെ ദിലീപുമായി പരിചയപ്പെടുത്തുന്നത്. പിന്നീട് ദിലീപുമായി ശരത്ത് അടുത്ത സൗഹൃദത്തിലായി.
പത്ത് വർഷം മുമ്പ് പുളിഞ്ചോട് കവലയിൽ സൂര്യ ഹോട്ടൽ ഉദ്ഘാടനം ചെയ്‌തത് ദിലീപായിരുന്നു. അതിന് ശേഷമാണ് ഊട്ടിയിലും ഹോട്ടൽ തുറന്നത്.
രാഷ്ട്രീയ നേതാക്കളടക്കം പല പ്രമുഖരും സൂര്യ ഹോട്ടലിലെ നിത്യ സന്ദർശകരാണ്. ചില ദിവസങ്ങളിൽ ദിലീപിന്റെ വീട്ടിലേക്കുള്ള ഭക്ഷണവും ശരത്തിന്റെ ഹോട്ടലിൽ നിന്നാണ് എത്തിച്ചിരുന്നത്.