ദുബൈ: കറാമയില് ഗ്യാസ് സിലിണ്ടര് പൊട്ടിത്തെറിച്ചുണ്ടായ അപകടത്തില് ഒരു മലയാളി കൂടി മരിച്ചു. തലശ്ശേരി ടെമ്പിള്ഗേറ്റ് നിട്ടൂര് വീട്ടില് നിധിന് ദാസാണ് (24) മരിച്ചത്. ഇതോടെ അപകടത്തില് മരിച്ചവരുടെ എണ്ണം രണ്ടായി. മലപ്പുറം പറവണ്ണ സ്വദേശി യാക്കൂബ് അബ്ദുല്ലയുടെ മൃതദേഹം ഇന്നലെ കണ്ടെത്തിയിരുന്നു.
ദുബൈ ആശുപത്രിയില് ചികില്സയിലിരിക്കെ ഇന്ന് രാവിലെയാണ് നിധിന്ദാസിന്റെ മരണം സ്ഥിരീകരിച്ചത്. സന്ദര്ശക വിസയില് ദുബൈയിലെത്തിയ നിധിന് കഴിഞ്ഞ ദിവസമാണ് ജോലി ലഭിച്ചത്.
ചൊവ്വാഴ്ച അര്ധരാത്രി കറാമ ‘ഡേ ടു ഡേ’ ഷോപ്പിങ് കേന്ദ്രത്തിന് സമീപം ബിന്ഹൈദര് ബില്ഡിങിലായിരുന്നു അപകടം. 12.20 ഓടെ ഗ്യാസ് ചോര്ച്ചയുണ്ടായി പൊട്ടിത്തെറിക്കുകയായിരുന്നു. അപകടത്തില് പരിക്കേറ്റ ഒമ്പതോളം പേരെ ദുബൈയിലെ വിവിധ ആശുപത്രികളില് പ്രവേശിപ്പിച്ചിരുന്നു. ഇതില് നിധിന് ദാസ് ഉള്പ്പെടെ മൂന്നു പേരുടെ നില ഗുരുതരം ആയിരുന്നു.