ആലപ്പുഴ: മാന്നാറില് അപകടത്തില്പ്പെട്ട് തലയ്ക്ക് ഗുരുതരമായ പരിക്കോടെ ദീര്ഘകാലം കിടപ്പിലായിരുന്ന യുവാവ് മരിച്ചു. പരുമല ഉഴത്തില് കാഞ്ഞിരത്തിന് മൂട്ടില് എം സി ആന്റണിയുടേയും ജസീന്തുടേയും മകന് മാത്യു കെ ആന്റണി(37) ആണ് മരിച്ചത്. ബൈക്ക് യാത്രയ്ക്കിടെ നായ കുറുകെ ചാടിയതിനെ തുടര്ന്നുണ്ടായ അപകടത്തിലാണ് ഗുരുതരമായ പരിക്കേറ്റ് അബോധാവസ്ഥയില് കിടപ്പിലായത്. 12വര്ഷത്തെ യാതനക്കൊടുവിലാണ് മാത്യു വിട പറഞ്ഞത്.
2011 നവംബര് 19നായിരുന്നു അപകടമുണ്ടായത്. 25-ാമത്തെ വയസിലാണ് മാത്യു അബോധാവസ്ഥയില് കിടപ്പിലാകുന്നത്. പുമലയില് സ്റ്റുഡിയോ നടത്തിയിരുന്ന മാത്യു വീട്ടിലേക്ക് ബൈക്കിലൂടെ പോകുമ്പോള് പാണ്ടനാട്ടില് വച്ച് തെരുവുനായ കുറുകെ ചാടിയാണ് അപകടമുണ്ടായത്.
50 ലക്ഷം രൂപയിലധികം ചെലവഴിച്ച് ശസ്ത്രക്രിയകളടക്കം നടത്തിയിട്ടും ഫലമുണ്ടായിരുന്നില്ല. കുടുംബ സ്വത്തില് നിന്ന് കിട്ടിയ വീടും സ്ഥലവും വിറ്റാണ് ചികിത്സയ്ക്കായുള്ള പണം കണ്ടെത്തിയത്.